Azərbaycana aid daha bir əlyazmanın UNESCO-nun Dünya yaddaşı (Memory of the World) beynəlxalq reyestrinə daxil edilməsi üzrə AMEA Əlyazmalar İnstitutu ilə sözügedən təşkilat arasında 27 iyul 2020-ci il tarixindən başlanmış onlayn işçi görüşləri və təqdimat prosesi yekunlaşıb. UNESCO Baş Qərargahının və Cənubi Koreyanın UNESCO üzrə Milli Komissiyasının təşəbbüsü ilə keçirilmiş çoxsaylı görüşlərə Dünya yaddaşı proqramının Qeydiyyat alt komitəsinin rəhbəri professor Jan Bos (Niderland) sədrlik edib. Qiymətləndirmə üzrə ekspertlər qismində isə UNESCO rəsmiləri, professorlar Joy Şpringer (Niderland), Kyunq-ho Suh (Cənubi Koreya), Rey Edmondson (Avstraliya) və Roslin Rassel (Avstraliya) çıxış ediblər.

Əlyazmalar İnstitutunun direktoru, UNESCO-nun Dünya Yaddaşı Proqramı üzrə Azərbaycan Milli Komitəsinin sədri, akademik Teymur Kərimlinin sədrliyi ilə İnstitutda yaradılmış komissiya (üzvlər: Əlyazmalar institutunun elmi işlər üzrə direktor müavini, filologiya üzrə elmlər doktoru, professor Paşa Kərimov; elmi katib, filologiya üzrə fəlsəfə doktoru, dosent Əzizağa Nəcəfov; Beynəlxalq əlaqələr şöbəsinin müdiri, tarix üzrə fəlsəfə doktoru Nigar Babaxanova) prosedur qaydalarına uyğun olaraq, İnstitutda mühafizə olunan, XIX əsrə aid unikal əlyazma kitabının UNESCO ekspertləri üçün təqdimatını həyata keçirib.

27 iyuldan avqustun 20-dək davam etmiş 14 onlayn işçi görüşdə İnstitutu təmsil edən komissiya üzvü, tarix üzrə fəlsəfə doktoru Nigar Babaxanova reyestrə daxil edilmək üçün təqdim olunmuş əlyazma haqqında həm əsas, həm də plenar iclaslarda çıxışlar edib, namizəd əlyazmanın unikallığı, elmi, tarixi, bədii əhəmiyyəti ilə bağlı İnstitutun mövqeyini və obyektiv qiymətləndirməyə yardım edəcək mötəbər arxiv sənədlərini UNESCO ekspertlərinin diqqətinə çatdırıb, proses zamanı meydana çıxmış əlavə, yardımçı sualların cavablandırılması məqsədilə komissiya üzvlərini UNESCO Qeydiyyat alt komitəsi ilə əlaqələndirib. UNESCO tərəfindən elmi qiymətləndirmə və ekspertiza fəaliyyəti uğurla yekunlaşacağı təqdirdə, Azərbaycana aid daha bir əlyazmanın yaxın bir neçə ay ərzində nüfuzlu Dünya yaddaşı reyestrinə daxil ediləcəyi gözlənilir.

Xatırladaq ki, indiyədək Əlyazmalar İnstitutunda saxlanılan 4 unikal əlyazma (Rüstəm Cürcaninin “Zəxireyi-Nizamşahi”, Əbülqasim Zəhravinin “Əl-məqələtus-səlasim”, Əbu Əli ibn Sinanın “Əl-qanun fit-tibb” və Məhəmməd Füzulinin anadilli “Divan”ı) Dünya yaddaşı reyestrinə daxil edilib.

manuscript.az